قصة غيوم الموت

سواد.. ضلمة، كنت شايفهم لحد ما واحدة واحدة صحيت من النوم… قومت قعدت على سريري وبصيت ناحية بلكونة أوضتي، بعد كده بصيت على الأرض جنب السرير ومسكت الأزازة البلاستيك اللي جنبي، شربت منها بوقين مايه بالعدد وحطتها تاني في مكانها، قومت من على السرير واتمشيت ناحية البلكونة وانا بفرك في عيني؛ وصلت لحد البلكونة وحطيت إيديا على السور وانا ببص للشارع وللسما.. الدنيا ضلمة كُحل!

بصيت في الساعة، لقيتها ٣ مساءًا، مش صباحًا.. يعني بكلامنا الدارج (تلاتة العصر).. بس عصر ايه بقى، ده كان زمان.. دلوقتي لا فيها ضُهر ولا عصر، ولا حتى مغرب ولا فجر، مافيش في السما غير غيوم وضلمة.

ماستغربتش اوي من الضلمة، ولو بتسأل نفسك دلوقتي انا ليه ماستغربتش، او ازاي اتعودت على أن الدنيا تبقى ضلمة بالنهار؛ فانا يا سيدي هقطع حيرتك وهجاوبك…

قصة غيوم الموت

من حوالي خمس سنين كانت الدنيا عادي؛ النهار والليل بيجوا في معادهم، لحد ما في يوم، صحي العالم كله على خبر أقل ما يُقال عنه إنه خبر اسود؛ ألا وهو خبر الحرب النووية اللي قامت بين دولة الهند ودولة باكستان، وكان سبب الحرب دي هي النزاعات اللي دايرة ما بينهم من زمان على أقليم كشمير.. عادي، النزاعات دي كان العالم كله بينام وبيصحى على اخبارها من غير اي دهشة او استغرب.. دولة توقع للدولة التانية طيارة، دولة تقتل جنود من الناحية التانية وتقول دول ماتوا بالغلط.. عادي يعني، مناوشات وصراعات كانت بتحصل كل يوم والتاني، لحد ما في يوم حصلت حرب بين الدولتين بسبب إن طيارة انضربت من الدولة التانية والطيارين اللي فيها ماتوا، لكن المرة دي الضرب ماكنش بالغلط ولا حتى الطرف الأول طلع اعتذر او برر للتاني.. فاعتبرتها الهند.. اللي الطيارة بتاعتها هي اللي انضربت بالمناسبة يعني؛ اعتبرتها أعلان رسمي بالحرب عليها، فجهزت ترسانتها النووية وضربت أول صاروخ.. وفي المقابل طبعًا جهزت باكستان هي كمان الترسانة وردت على الصاروخ بتلاتة، بس تفتكر الهند تسكت.. لا ماسكتتش.. ماسكتتش بالرغم من التدخلات الدولية لوقف الحرب، او بالتحديد.. لوقف الكارثة قبل ما تحصل، بس زي ما قولتلك، التدخل كان متأخر والهند كانت ردت على التلات صواريخ بخمسة، وفضلت الحرب دايرة ما بينهم لمدة يومين تقريبًا، يومين بس كانوا كفاية اوي عشان الدولتين يتسببوا في دمار ومحوا نفسهم، هم والدول جيرانهم من على خريطة العالم.. ايوة يا صديقي، الحرب النووية حصلت، لكن مش بين روسيا وامريكا زي ما العالم كله كان متوقع او كان مستني، الحرب كانت أطرافها دولتين ترسانتهم النووية مش قوية اوي زي امريكا وروسيا… وعشان كده الحرب ما بينهم ما قضتش على الكرة الأرضية ولا حاجة، هي قضت على الدولتين وعلى جيرانهم، واتسببت وقتها في موت حوالي ٣٠ مل

قصة غيوم الموت

العُملة الورقية او الفضية او حتى الألكترونية، اختفوا.. والعالم رجع يتعامل تاني بالمقايضة، يعني الدول الكبيرة واللي كان عندها مخزون من الفاكهة والقمح، بقت بتدي الدول الفقيرة اللي زي دولتي كده القمح والأكل، وده في مقابل حاجات.. حاجات تبان في ظاهرها عدل، لكن جواها ظلم.. كل الظلم، ماهو مش من العدل ابدًا أن الدول دي عشان تدينا أكل، في مُقابله تاخد من عندنا أعضاء بشرية وناس يخدومها ويشتغلوا فيها ساعات طويلة من غير نوم، وطبعًا بيشتغلوا في المولدات اللي بتولد للدول دي الكهربا عشان تفضل منورة، والأعضاء كانوا بيدوها للمواطنين المرضى عشان يطولوا في أعمارهم، والتبادل ده كان بيتم من خلال سُفن لأن الطيارات مابقاش ليها وجود ولا بقت تعرف تطير في الأجواء دي.. يعني سفينة حربية مليانة أكل وقمح، بترسى على شط من شواطيء بلدنا، وقتها بيبقى مستنيها مجموعة من السماسرة ومعاهم شوية مرتزقة او بلطجية بيسموهم الغفر.. والسماسرة دول بيسلموا للسفينة البني أدمين اللي قدروا يقبضوا عليهم او ياخدوهم بالأكراه، وكمان معاهم شوية أعضاء بني أدمين من اللي لسه ميتين طازة او من الناس اللي مرضهم شديد اوي، الناس دول بيموتوهم وبياخدوا أعضائهم وبيدوها للسفينة دي، وفي المقابل زي ما قولتلك، بياخدوا الأكل والقمح وبيبقوا هم المتحكمين فيه، ومش بيبقوا مُتحكمين فيه وبس.. دول كمان بيبقوا مُتحكمين في مصيرنا احنا، اه.. ماهو كل الرجالة او الستات او حتى الأطفال اللي بيقدروا يشتغلوا ولسه فيهم صحة، كانوا بيشتغلوا عند السماسرة دول في المولدات اللي عندنا هنا، المولدات اللي بتنور البيوت واحيانًا الشوارع، وفي مقابل الشغل ده، العمال.. اللي واحد منهم، كانوا بياخدوا الفتافيت او بواقي الأكل اللي بيتفضل من السماسرة ورجالتهم والغفر.

قصة غيوم الموت

مهزلة.. العالم بقى في مهزلة، فوضى في كل مكان، الحروب الأهلية بقينا بنسمع عنها يوميًا، دول اختفت من على الخريطة.. ودول كانت غنية وبقت في مجاعة، ده حتى الناس والمناطق والشوارع مابقوش زي ما كانوا.. الأمراض بقت زي الكلاب المسعورة.. بتنهش في جسم كل اللي مناعتهم ضعيفة، وبالتالي حالات الوفاة زادت ومعاها المقابر، ومش بس المقابر.. دي كمان مقالب الزبالة والخرابات، بقى ليهم المكان الأكبر من الشوارع.. وطبعًا بما إننا بنتكلم عن مقابر جماعية وخرابات وضلمة، فبالتأكيد هيكون في جن ودجالين.. ايوة يا صديقي ماتستغربش اوي كده، الدجل والشعوذة والجهل.. كل الحاجات دي لسه موجودة، ومش زي الأول وبس.. لأ، دي بقت اكتر وابشع وافظع؛ الدجالين بقوا بيشتغلوا اكتر من الطب.. الطب اللي مابقاش له مستشفيات، بقى بيقتصر بس على مراكز اسعاف بسيطة اوي، وانتشار الدجل كان بسبب انتشار حالات الصرع بين الناس، واللي المعظم بقى مقتنع إن دي حالات مَس من الجن او حتى لَبس، مع إنها في الحقيقة بتبقى غير كده تمامًا، حالات الصرع الزيادة دي كان سببها التلوث والجو المقزز اللي احنا عايشين فيه، بس تقول لمين.. احنا اللي فينا هيفضل فينا لحد نهاية البشرية، بس صدقني كل ده ماكنش مهم بالنسبة لي، انا اللي يهمني هم أهلي، او بمعنى أوضح.. اللي اتبقى من أهلي، اخواتي الاتنين، مصطفى الكبير.. وطه الصغير، ولو هتسألني عن بقية أهلي، فانا هقولك إنهم ماتوا، مراتي وابني اللي كان عنده خمس سنين، ومرات مصطفى وعياله الاتنين وامي وابويا، كل دول ماتوا.. ماتوا وقدرت انا واخواتي إننا ندفنهم بعد موتهم في مكان ما بعيد عن إيد الغفر والسماسرة والدجالين، ولحد هنا اسمح لي اقولك إن الحياة ماوقفتش ولا انا موتت.. هو اه انا بتمنى الموت كل يوم، وكل ما اغمض عيني عشان انام، بتمنى إن انا مافتحهاش تاني، لكن هنقول ايه.. سُنة الحياة، روحي لسه متعلقة في الدنيا زي الغريق اللي لو عاوز ينتحر ورميته في البحر، هتلاقيه بيضبش بإيديه الاتنين وبيعوم ولا اجدعها سباح عشان يوصل للبر!

وقفت في البلكونة وانا سرحان في كل البلاوي اللي عيشتها في الخمس سنين اللي فاتوا، بصيت للسما وسرحت.. سرحت في الغيوم اللي بتشبه كتير اوي للمستقبل الجاي في الخمس سنين اللي هيجوا بعد كده، بس في لحظة قطع سرحاني صوت سُعال اخويا مصطفى من الأوضة اللي جنبي؛ مصطفى بقاله كام يوم تعبان اوي وبسبب تعبه ده مابيروحش الشغل في المولد اللي بيملكه استاذ شفيع، والمولد ده هو عبارة عن مكان بيشتغلوا فيه مجموعة من العمال، بيفضلوا يلفوا أدرعة حديد عشان يولدوا طاقة بتتحول بعد كده لكهربا.. بنستخدمها عشان نعرف نعيش، وبالمناسبة يعني انا بشتغل معاه انا وطه.. بنشتغل عشان نعرف نلاقي اخر كل يوم اكل يخلينا عايشين لليوم اللي بعده، أما بقى عن شفيع صاحب المولد.. فده راجل ضلالي، سمسار من السماسرة، مابيهمهوش أي حاجة غير الشغل والسمسرة وبس، بيرميلنا الفتافيت والأكل المعفن عشان بس نقدر عايشين، وعشان كده مصطفى اخويا بسبب الأكل والماية والأجواء وشدة حزنه على موت مراته وعياله، المرض أعلن الحرب على جسمه اللي بقى ضعيف ومابقاش يقدر يقاوم.

فوقت من سرحاني زي ما قولت على صوت كُحة مصطفى، خرجت من البلكونة جري وروحت على أوضته، دخلت عليه لقيته نايم في سريره وعمال يكُح وهو بياخد نفسه بالعافية، قربت منه وحاولت اساعده، لكنه فضل يكح لحد ما قومت على المطبخ وجيبتله شوية مايه وشربته، دقايق وابتدى مصطفى يهدى ويتكلم معايا بصوت مبحوح من كتر الكحة اللي كحها..

-محمود.. انا.. انا تعبان اوي، حاسس اني خلاص هموت.. نهايتي.. نهايتي بتقرب وشايفها قصاد عيني يا اخويا.

حضنته وانا قلبي بيتقطع على حالته وعلى الحالة اللي احنا وصلنالها..

-ماتقولش كده يا اخويا، ده انت الخير والبركة، ربنا يطول لنا في عمرك ومايحرمناش منك أبدًا.

بَعدني عنه وبص لي والدموع في عينيه..

قصة غيوم الموت

-لا.. العمر مش هيطول اكتر من كده، انا اساسًا مش عاوزه يطول، انا مراتي وولادي وابوك وامك وحشوني اوي وعاوز اروحلهم، ادعيلي اموت وارتاح عشان اقبلهم، ماهو أكيد.. أكيد ربنا عزوجل عنده خير وجنة ورحمة، وانا واثق إني لما اموت هرتاح من جهنم اللي احنا عايشين فيها دي، بس يا اخويا أمانة عليك.. أمانة عليك وفي رقبتك ليوم الدين، أوعى تخليهم ياخدوا جتتي لما اموت ولا حتى ياخدوا أي حاجة منها، اعمل معايا زي ما عملنا مع أهالينا.. خدني انت وطه وادفنوني في مكان بعيد عن الُترب اللي الدجالين وغفر السماسرة بينبشوها، ادفنوني في مكان وانسوه.. ماتجوش تزوروني عشان ماحدش يعرف انا فين ويطلعني من قبري، أمانة.. دي أمانة ووصيتي ليك قبل ما اموت.

هَديته وحاولت اواسيه لما رديت عليه بابتسامة بهتانة..

-ماتقولش كده يا درش.. انت هتعيش، هتعيش لحد ما العك اللي احنا فيه ده يخلص والحياة ترجع زي ما كانت، فاكر يا مصطفى.. فاكر شركة الأجهزة الكهربائية بتاعتنا اللي خربت من بعد الحرب، انا حاسس بقى إنك هتفضل عايش لحد ما الدنيا ترجع زي ما كانت، ونرجع انا وانت وطه نفتحها من تاني ونشتغل فيها ونبقى ملوك السوق.

لَف اخويا وشه وبص ناحية بلكونة أوضته، سَرح لثواني في الضلمة اللي برة البيت وقال لي وهو بياخد نَفس طويل وبيخرجه بألم..

-ااه.. الألم اللي انا حاسس بيه بيقول غير كده، وبعدين تفتكر يعني لو رجعنا تاني وجهنم اللي احنا عايشين فيها دي اتحولت لجنة، تفتكر انا هبقى سعيد، انت هتبقى سعيد؟.. قول لي هنعيش ازاي من غير أهالينا، ازاي هنصحى كل يوم الصبح ونشوف نور الشمس ونشتغل واحنا من غير عيالنا، لا يا محمود.. اللي انت بتقوله ده مستحيل يحصل، وحتى لو حصل.. فمش هيبقى له طعم، احنا خلاص حياتنا بتخلص والدنيا من حوالينا بتنتهي، فادعيلي إني اموت قبل ما اشوف نهايتها واتعذب عذاب زيادة عن اللي انا بتعذبه، ادعيلي يا اخويا بالراحة واياك تنسى الوصية.. إياك يا محمود.

خلص مصطفى كلامه وبعد ما هَديته وخليته ينام ويرتاح، قفلت عليه باب الأوضة وخرجت، روحت للمطبخ وأخدت ثمرة بايظة كانت مرمية على الرخامة، أكلت منها قطمتين وانا بروح ناحية أوضتي عشان البس وانزل للشغل، ما انا بشتغل من الساعة خمسة مساءًا.. للساعة خمسة صباحًا، بس مش هتفرق صباحًا من مساءًا يعني.. كده كده اليوم كله مساءًا، أما على الناحية التانية بقى، فاخويا الصغير طه.. بيشتغل في وردية عكس ورديتي، يعني بيشتغل من الساعة اربعة صباحًا لاربعة مساءًا، وعشان كده في الوقت اللي خرجت فيه من المطبخ وكنت رايح أوضتي، سمعت صوت باب البيت بيتفتح، دخل منه طه اخويا اللي أول ما شوفته سلمت عليه..

قصة غيوم الموت

-حمد لله عالسلامة يا طه.

بص لي وماردش، وشه كان مقلوب وكان واضح اوي انه متضايق من حاجة، دخل وقفل الباب وراه ورمى المفاتيح على كرسي من كراسي الصالة وقعد على الكرسي اللي جنبه، قلع جزمته وهو لسه متضايق ومانطقش بحرف واحد.. وقتها قربت منه وسألته..

-ايه يا ابني مالك.. وشك مقلوب كده ليه؟!

رَفع راسه وبص لي بنظرة مليانة تعب وأرهاق وحزن..

-شفيع يا محمود.. شفيع النهاردة سأل على اخوك، ولما قولتله إنه لسه تعبان عَرض عليا عرض.. قال لي ايه رأيك لو..

وقبل ما يكمل كلامه، قاطعته بنرفزة..

-لو ايه.. انت اتجننت، انا عارف شفيع كلمك في ايه، أكيد قالك ايه رأيك لو اديتنا اخوك وبيعناه أعضاء وخدنا بداله أكل، لا لا.. مستحيل، مستحيل تكون بتفكر بالطريقة دي، أكيد انت ماتقصدش انك بتفكر، وأكيد كمان انت.. انت متضايق من عرض شفيع ومابتفكرش تنفذه يعني، صح يا طه.. صح؟!

سكت طه لثواني، بعدهم اتكلم وقال لي بحزن..

-وليه لأ.. ليه مانستفادش وناخد منه أكل نضيف بدل الزبالة اللي بناكلها كل يوم دي، يعني انت عاجبك حالنا يا محمود.. عاجباك التفاحة البايظة اللي انت بتاكل فيها بقالك يومين دي، ايه.. مش نفسك يا أخي تاكل عيش معمول من قمح نضيف وكام حتة لحمة مع فاكهة طازة.. فكر يا أخي بعقلك شوية، ده الحي أبقى من الميت.

اول ما قال جملته الاخيرة دي، قربت منه ومسكته من رقبته..

-ميت مين ياللي ماعندكش لا نخوة ولا ضمير.. ميت مين، اخوك لسه عايش ماماتش.

زق إيدي وهو بيقولي بصوت واطي عشان مصطفى مايسمعهوش..

-بس هيموت.. كده كده هيموت يا محمود، انت مش شايف شكله عامل ازاي، ده بقاله أيام مابينامش ساعتين على بعض بسبب الكحة، فمافيهاش مانع يعني إنه لما يموت نستفاد منه بدل ما جتته ياكلها التراب، وقبل بس ما تقولي انت لو مكانه كنت هتقول كده.. فخليني اقولك اه، انا لو مكان مصطفى وهو مكاني، كنت هوافق واقولك سلموا جتتي وانا عيان كده لشفيع واستفادوا انتوا بالأكل اللي هتاخدوه منه، انا مش أناني يا محمود.. انا بس عاوز اعيش.

حطيت إيدي على راسي وبعدت عنه، مابقتش عارف اقوله ايه، دماغي من كتر التفكير وضغط الدم العالي كانت هتنفجر، فضلت ساكت وانا عمال اتمشى حواليه لحد ما وقفت قصاده وشاورتله بنظرة مليانة غِل وتحدي..

-انت مش مكانه وهو مش مكانك، وزي ما قولتلك هو ماماتش، وحتى لو مات.. فهو موصيني انه يندفن زي ما دفننا أهالينا، وانا بقى مش هكسر وصيته ولا اسلم جثته لشفيع، لا وهو حي، ولا وهو ميت.. ولو فكرت بس يا طه مجرد تفكير.. مجرد تفكير بس إنك تسلمه لغفر شفيع، اقسملك باللي خلق الخلق لا هكون انا بنفسي قاتلك ومسلمك مش لشفيع بقى، لا.. انا هسلمك لكلاب السكك ينهشوا في لحمك، أمين؟!.. انا هدخل البس وانزل الشغل، ولما اروح واقابل شفيع، هقوله إن مصطفى حالته بتتحسن وانه هيرجع الشغل بعد يومين، وانت كمان لما تشوفه بكرة ابقى آمن على كلامي، واي حاجة هتتعمل غير اللي انا قولته ده، ماقدرش اقولك انا ممكن اعمل فيك ايه.. صدقني رقبتك هتبقى هي أهون حاجة عندي، وزي ما اخوك الكبير اللي رباك هيهون عليك وهتسلمه للي ماعندوش ضمير ده، فانت كمان هتهون عليا وتسليمك لكلاب الترب والسكك، هيبقى بالنسبة لي حاجة بسيطة اوي جنب كسرك لوصية اخوك وأهانته وهو ميت، خلص الكلام يا ابن امي وابويا.

خلصت كلامي مع طه ودخلت غيرت هدومي ونزلت على الشغل، وصلت لموقع المولد ولبست هدوم الشغل وابتديت اشتغل انا والعمال اللي معايا، ساعات من الشغل المتواصل في لف الأدرعة اللي متوصلة بتروس بتولد طاقة، لحد ما تعبنا وجه وقت الراحة، وقتها قعدنا كلنا كعمال يعني عشان ناكل الوجبة بتاعتنا، بس في وسط ما كنا بناكل وانا كنت سرحان في الأكل اللي مابعرفش اكله الا في الشغل بسبب إنه أنضف من الاكل اللي بنستلمه واحنا مروحين، فجأة سمعت صوت هادي زميلي اللي كان قاعد جنبي وهو بيهمسلي..

-محمود.. الريس شفيع، جاي وبيبص عليك.

قصة غيوم الموت

سيبت الأكل من إيدي وقومت وقفت، بصيت له وهو بيقرب عليا بتحدي، شخص سمج وبارد.. كرشه قصاده مترين زي ما بيقولوا.. ريحته النضيفة وهيئته كانوا بيخلوني استحقره اكتر واكتر.. ماهو لما واحد في وسط العفن اللي احنا عايشين فيه ده كله، يبقى بالنضافة والشياكة دي، أكيد هيبقى وراه مصايب، لكنه قَطع تفكيري وكل الكلام اللي كنت مرتب إني هقولهوله اول ما قرب مني وقال لي بابتسامته اللي بكرهها اكتر ما بكره الذل والمهانة اللي احنا عايشين فيهم..

-ابو حنفي.. عامل يا وحش؟!

ابتسمتله انا كمان ابتسامة مُصطنعة..

-زي الفل ياريس، خير.. في حاجة؟!

قرب مني اكتر وحط إيده على كتفي وهو بيقولي..

-اخوك مصطفى.. بقاله فترة تعبان ومابيجيش الشغل، ولما سألت اخوك طه عليه النهاردة الصبح، قال لي إن مرضه بيزيد وإنه…

قاطعته قبل ما يكمل كلامه..

-إنه أيه يا ريس، لا مش إنه ولا حاجة، انا اخويا الحمد لله يعني بيتعافى وكلها يومين وهينزل الشغل، انا براعيه وباخد بالي منه، وطه تقريبًا مايعرفش عنه حاجة خالص.. ماتقلقش ياريس، يومين بالظبط وهيرجع الشغل تاني.

لما قولتله كده، بص لي بنظرة مليانة خُبث، شيطان وانا عارفه.. أكيد مستني اخويا يموت عشان ياخد أعضاؤه ويديها للسماسرة اللي بيجوا مع المراكب من برة، ولا ليه يستناه لما يموت.. ده أبليس، يعني ممكن اوي يبعت الغفر يخطفوه وهو عايش من ورانا، ويقطعه حتت ويستبدله بأكل!

يتبع

(ده الجزء الأول من قصة غيوم الموت..)